home

ಪೀಠಿಕೆ

2003 ರಲ್ಲಿ, ರಾಜ್ಯ ಸಚಿವಸಂಪುಟವು ಏಕೀಕೃತ ವಿದ್ಯುನ್ಮಾನ ಸಂಗ್ರಹಣಾ (ಇ-ಸಂಗ್ರಹಣೆ) ವೇದಿಕೆಯೊಂದನ್ನು ನಿರ್ಮಿಸಲು ಅನುಮೋದನೆ ನೀಡಿತ್ತು. ಇ-ಸಂಗ್ರಹಣಾ ಯೋಜನೆಗೆ ಒಟ್ಟಾರೆಯಾಗಿ ಮಾರ್ಗದರ್ಶನ ಮತ್ತು ದಿಕ್ಸೂಚನೆಗಳನ್ನು ನೀಡಲು ಕರ್ನಾಟಕ ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿಗಳ ಅಧ್ಯಕ್ಷತೆಯಲ್ಲಿ ಒಂದು ಮಾರ್ಗದರ್ಶನ ಸಮಿತಿಯನ್ನೂ ರಚಿಸಲಾಯಿತು.  ನೀತಿ ನಿಯಮಗಳ ಅನುಷ್ಠಾನ ಹಾಗೂ ಮಾರ್ಗದರ್ಶನ ನೀಡಲು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆಯ (ಇ-ಆಡಳಿತ) ಪ್ರಧಾನ ಕಾರ್ಯದರ್ಶಿಗಳು ಹಾಗೂ ಇ-ಆಡಳಿತ ಕೇಂದ್ರದ ಅಧ್ಯಕ್ಷರ ನೇತೃತ್ವದಲ್ಲಿ ಯೋಜನಾ ಸಮನ್ವಯ ಸಮಿತಿಯೊಂದನ್ನು ರಚಿಸಲಾಯಿತು.

ಇ-ಆಡಳಿತ ಕೇಂದ್ರವು ಎಲ್ಲಾ ಇಲಾಖೆಗಳ ಅವಶ್ಯಕತೆಗನುಗುಣವಾಗಿ ಮಾಹಿತಿ ತಂತ್ರಜ್ಞಾನವನ್ನು ಉಪಯೋಗಿಸಿಕೊಂಡು ಪಾರದರ್ಶಕವಾಗಿ ಮತ್ತು ದಕ್ಷತೆಯಿಂದ ಕಾರ್ಯ ನಿರ್ವಹಿಸಲು ತಂತ್ರಾಂಶ ಆಧಾರಿತ ಸಲಹೆ ಸೂಚನೆಗಳನ್ನು ನೀಡುವ ಸಂಸ್ಥೆಯಾಗಿದೆ. ಜೊತೆಗೆ ಯಾವುದೇ ಇಲಾಖೆ ಇ-ಆಡಳಿತವನ್ನು ಅಳವಡಿಸಲು ಅನುಕೂಲವಾಗುವಂತೆ ತಂತ್ರಜ್ಞರ ಸೇವೆಯನ್ನು ಕೂಡ ಒದಗಿಸಿಕೊಡುತ್ತದೆ. ಅಲ್ಲದೆ, ಎಲ್ಲಾ ಇಲಾಖೆಗಳಿಗೂ ಅನ್ವಯವಾಗುವಂಥ ಕೆಲವು ಯೋಜನೆಗಳನ್ನು ರೂಪಿಸಿ ಈ ನಿಟ್ಟಿನಲ್ಲಿ ಕಾರ್ಯವನ್ನು ಜರುಗಿಸುತ್ತಿವೆ. ಉದಾಹರಣೆಗೆ,

1. ಇ-ಸಂಗ್ರಹಣೆಯು ಸರ್ಕಾರವು ಬೃಹತ್ ಪ್ರಮಾಣದ ಸಂಗ್ರಹಣೆ ಮಾಡುವ ಕಾರ್ಯವಾಗಿರುತ್ತದೆ. ಈ ರೀತಿಯ ಸಂಗ್ರಹಣೆಯು ಪಾರದರ್ಶಕವಾಗಿ ಮತ್ತು ಅತ್ಯಂತ ದಕ್ಷ ರೀತಿಯಲ್ಲಿ ಜರುಗುವುದು ಅತ್ಯಾವಶ್ಯಕವಾಗಿದೆ. ಈ ನಿಟ್ಟಿನಲ್ಲಿ ಇ-ಆಡಳಿತ ಕೇಂದ್ರವು ಈ ಯೋಜನೆಯನ್ನು ರೂಪಿಸಿ 2006ರಿಂದ ಯೋಜನೆಯು ಪ್ರಗತಿಯಲ್ಲಿದ್ದು, ರೂ.2,54,774 ಕೋಟಿಗಳಿಗಿಂತ ಮೇಲ್ಪಟ್ಟು ಸಂಗ್ರಹಣ ಪ್ರಕ್ರಿಯೆ ಈ ವೇದಿಕೆಯ ಮುಖಾಂತರ ನಡೆದಿದೆ.
2. ಈ ಸಂಗ್ರಹಣ ಪ್ರಕ್ರಿಯೆ ವೆಬ್ ಆಧಾರಿತವಾದುದರಿಂದ ಯಾವುದೇ ವ್ಯಕ್ತಿ ಎಲ್ಲಿಂದಲಾದರೂ ಮತ್ತು ಯಾವುದೇ ಸಮಯದಲ್ಲಿ ಯಾವುದೇ ಒತ್ತಡವಿಲ್ಲದೆ ಈ ಪ್ರಕ್ರಿಯೆಯಲ್ಲಿ ಭಾಗವಹಿಸುವ  ಅವಕಾಶವಿರುವುದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಬಿಡ್ ದಾರರು ಭಾಗವಹಿಸುತ್ತಿದ್ದಾರೆ. ಇದರಿಂದಾಗಿ ಅಂದಾಜು ವೆಚ್ಚಕ್ಕಿಂತ ಬಿಡ್ ಮಾಡುವ ಮೊಬಲಗು ಶೇ.10ರಷ್ಟು ಕಡಿಮೆಯಾಗಿದೆಯೆಂದು ಅಂದಾಜಿಸಲಾಗಿದೆ. ಜೊತೆಗೆ ಈ ಸಂಪೂರ್ಣ ಯೋಜನೆಯು ಆನ್ಲೈನ್ ಆಗಿದ್ದು, ಕಾಗದರಹಿತ ಯೋಜನೆಯಾಗಿರುವುದು ಕೂಡ ಇದರ ವೈಶಿಷ್ಟ್ಯ.